Asturias, el viaje de una canción presenta un percorríu triple, emocional, xeográficu y musical a partir del éxitu llográu, a lo llargo de cinco décades, pola composición de Víctor Manuel sobre un poema de Pedro Garfias. Convertida anguaño n’himnu oficiosu d’Asturies, los sos versos espierten güei emoción y solidaridá, pero pocos conocen el tresfondu sociopolíticu que s’escuende detrás nin el camín tan llargu que percorrió’l cantautor asturianu hasta ver el so cantar coriáu por milenta almes nos estadios.

Producío por TPA, Asturias, el viaje de una canción ta dirixío por Jose Braña y Chus Neira, el tándem que yá firmó pa la cadena dos documentales de referencia sobre la música n’Asturies como son Los años eléctricos (2006) y First we take Milán (2016), dedicaos a la historia de la música popular contemporánea na rexón y al nacimientu de la escena indie asturiana nos noventa, respectivamente.

Los protagonistes d’esti trabayu nuevu son el mesmu Víctor Manuel, narrador de la peripecia histórica del poema y del cantar, y el productor Paco Loco, «home del Sur» dende los sos estudios d’El Puerto de Santa María (Cádiz), onde se grabó la versión cola dirección musical de Joaquín Pascual. Los músicos invitaos a volver grabar «Asturias» y a reflexonar sobre lo qu’un cantar pue suponer pa un territoriu completen xeneraciones y estilos variaos dientro de la escena más allegada a la tradición renovada dende la canción autoral. Asina, el viaxe axunta en carretera al veteranu Chus Pedro (Nuberu) cola so paisana Marisa Valle Roso. Sienta al dúu de post-rock L-R, formáu por Leticia Baselgas y Rubén Bada, col cantautor Nacho Vegas. Caún d’ellos va apurrir una sensibilidá y una óptica distinta nesi percorríu d’Asturies a Cádiz y que pasa tamién per México, onde Garfias s’exilió y falleció y onde Víctor Manuel conoció’l poema. El documental métese dientro del procesu de reconstrucción d’un himnu como ye esti cantar y asiste en directo a la grabación, dende los primeros ensayos hasta la llegada de Víctor Manuel al estudiu pa completar la versión.