Menú
Menú
Menú
Menú
Víctor Manuel San José (Mieres, 1947) ye una de les voces más populares de la canción d’autor n’español, con una trayectoria qu’abarca yá más de cinco décades y que foi quién a trespasar xéneros, fronteres y temátiques, siempre con un compromisu social y políticu bien destacáu que lu convirtió n’iconu de la transición española. Dende’l principiu, nos años sesenta, hasta anguaño, rescamplen discos como Quiero abrazarte tanto (1970), Soy un corazón tendido al sol (1978), El lanzador de cuchillos (1984) o A dónde irán los besos (1993), amás de los trabayos en directo tan emponderaos, davezu en compañía de la so pareya, la cantante y actriz Ana Belén, Vivir para cantarlo (1999) o 50 años no es nada (2014).
Chus Pedro (L'Entregu, 1955) desenvolvió una trayectoria musical mui vinculada al grupu Nuberu, que fundó con Manolo Peñayos en 1976. Con esta formación, Chus Pedro convirtióse nuna figura icónica na defensa de la cultura y la llingua asturiana y nun pioneru na renovación del folk asturianu, con trabayos tan señalaos como Asturies, ayeri y güei (1978), Atiendi, Asturies (1980) o Agua de la fonte clara (1993). La so voz, la so forma de cantar, la so vinculación a una tradición llírica propia, convirtiéronlu, acullá de Nuberu, nuna figura clave na cultura asturiana contemporánea.
Francisco Martínez nació en México en 1963 y na so mocedá en Xixón, onde la familia se desplazó, convirtióse en Paco Loco, al formar con Carlos Redondo una de les bandes más populares del pop-rock rexonal de los ochenta, Los Locos, grupu consideráu güei formación de cultu nel panorama nacional. Del so trabayu como guitarrista naquella formación, Paco Loco saltó aína al ámbitu de la producción, un estudiu en Xixón, Odds, qu’a mediaos de los noventa treslladó al Puerto de Santa María, onde sigue anguaño establecíu. Les sos grabaciones foron responsables del boom del Xixón Sound, primero, y del desenvolvimientu de la escena independiente n’España. De les más de 800 bandes que produció pueden destacase nomes como The Hinds, Posies, Mikel Erentxun, Bunbury, Australian Blonde, Manta Ray…
El músicu xixonés Nacho Vegas (1974) ye ún de los grandes renovadores de la canción d’autor n’España nes últimes décades. Procedente de la escena noise temprana de la época del Xixón Sound, primero como Eliminator Jr y depués con Manta Ray, nel cambéu de sieglu empieza a componer y a cantar n’español y asturianu y arranca una trayectoria personalísima mui marcada pola estética de voces de la música independiente como Nick Cave, Townes Van Zandt, Dylan. Actos inexplicables (2001) y el doble Cajas de música difíciles de parar (2003) foron los primeros trabayos d’una carrera qu’a partir de La zona sucia (2011) suma un compromisu políticu anticapitalista esplícitu y militante. Figura de cultu na escena independiente nacional, el trabayu recibe tamién un respaldu bien grande nel continente americanu, sobre manera en México y Arxentina.
La llangreana Marisa Valle Roso (1987) inicióse nel mundu de la tonada asturiana, xéneru nel que destacó en concursos dende mui pequeña y col que dio los primeros pasos na edición discográfica. Ente'l 2015 y el 2017 la so carrera cambia, al incorporar nel repertoriu a autores como Chavela Vargas, Dulce Pontes, Violeta Parra, Mercedes Sosa… Toa esta nueva vida musical espéyase nel discu Consciente (2017), al que diba siguir Lo fugaz (2022). Les sos cualidaes vocales y la so capacidá espresiva convirtiéronla nuna de les cantantes más prometedores del panorama nacional, apadrinada y respetada por músicos como’l mesmu Víctor Manuel.
El músicu avilesín Rubén Bada ye ún de los intérpretes más solicitaos dientro de la escena folk asturiana y con proyección internacional. Multiinstrumentista conocíu más polos sos trabayos col violín, la guitarra y el bouzouki, empezó a tocar con 14 años. Ente la nómina de formaciones peles que pasó, bien llarga, destaquen los grupos Xéliba, Corquiéu, N’Arba o Dixebra. Collaboró colos irlandeses At First Light, Barry Kerr o’l gaiteru John McSherry y anguaño ye ún de los miembros de la banda de Rodrigo Cuevas. Con Leticia Baselgas fundó’l dúu de post-folk L-R, onde ufierta una rellectura de los llinguaxes tradicionales pasaos pela óptica del rock d’autor más alternativu.
La cantante y panderetera Leticia González (Baselgas, Grau) ye llicenciada en Belles Artes y ta desenvolviendo una carrera musical mui lligada a la so trayectoria como artista. Tamién formó parte de dellos colectivos d’investigación etnográfica y de cultura tradicional d’ente los que destaca’l Conceyu de Cultura Tradicional Vezos Astures, y foi miembru de grupos como Menaxatruá o Trovando Trío. Dende'l 2018 forma pareya artística con Rubén Bada en L-R, reconocíos pola crítica como ún de los meyores esponentes de la última renovación del folk asturianu. Dende esa vertiente de post-folk, editaron yá trés discos, el so debut nel 2018 y los trabayos N.O.S. (2021) y V.O.S. (2024).
El músicu albaceteñu Joaquín Pascual (1964) ye ún de los creadores más singulares de la escena alternativa nacional, posesor d’una voz singular y una atmósfera única nos sos testos. Miembru de los imprescindibles Surfin’ Bichos, punxo en marcha depués Mercromina y el proyectu personal Travolta. En solitario, y col nome de Joaquín Pascual, suma yá ocho discos, ente los que rescamplen La Frontera (2012) o l’últimu, Baladas para un atraco (2023).
