En metá de la Guerra Civil, el poeta castellano-andaluz Pedro Garfias escribió dende’l frente un poema d’urxencia al enterase de qu’Asturies acababa de cayer en manes del exércitu franquista. Trés décades más tarde, un Víctor Manuel mozu conoció esos versos de boca del exiliu asturianu en México y musicólos, con urxencia asemeyada, dando forma a un cantar bien guapu qu’acabó por convertise n’himnu oficiosu d’Asturies.

El documental “Asturias, el viaje de una canción”, producíu pola Televisión del Principáu d’Asturies (TPA), esplora la xénesis del testu y del cantar y acompaña a cinco músicos asturianos nun viaxe a esi Sur onde nacieron les palabres de Garfias pa recrear la composición al par del propiu Víctor Manuel. El productor xixonés y pope del indie patriu Paco Loco, Joaquín Pascual (“Surfin Bichos”), Chus Pedro (“Nuberu”), el cantautor Nacho Vegas, la cantante Marisa Valle Roso y el dúu de post-folk “L-R”, formáu por Leticia Baselgas y Rubén Bada, protagonicen la cinta, una mestura de “road-movie” y “rockumentary” que viaxa al centru del megollu emocional y musical de la tierra asturiana.